كلام بالعامية عن النظام وخروجنا مالتبعية !

نشر بالبديل بتاريخ 20 أغسطس , 2013
http://elbadil.com/2013/08/20/%D8%A3%D8%B4%D8%B1%D9%81-%D9%85%D9%88%D8%B3%D9%89-%D9%83%D9%84%D8%A7%D9%85-%D8%A8%D8%A7%D9%84%D8%B9%D8%A7%D9%85%D9%8A%D8%A9-%D8%B9%D9%86-%D8%A7%D9%84%D9%86%D8%B8%D8%A7%D9%85-%D9%88%D8%AE%D8%B1/

المرة دى  المقال بالعامية .. حسيت ان دا ضرورى باعتبار ان المقال دا مش موجه للنظام الحالى وبس ولا للمثقفين أو صناع القرار فى كل تيار سياسي ، الكلام المفروض يتوجه لكل الناس ، لازم الكل يقراه وخصوصا للى بيتفرجوا على تليفزيونات دريم والمحور واون تى فى وغيرها – مش هشتم متخافوش ..

وانا بفتح تليفزيوناتنا الخاصة والتليفزيون المصرى  ، لقيت  الكلام اغلبه عن الاستقلال الوطنى والكلام اللى كنا مبنسمعوش نهائيا فى التليفزيون ولا نقراه فى الجرائد من 40 سنة .. من أيام السادات بعد اتفاق كامب ديفيد ومرورا بمبارك ولحد مرسي  .. كمان الكلام فيه بشكل واضح ان مبارك رمانا فى حضن الأمريكى ولازم نتحرر ودلوقتى .. والبعض تجرأ إلى الحديث عن كامب ديفيد .. يااااه هو انا بحلم ولا إيه ؟ هو دا إعلامنا بجد اللى طول عمره مكانش يجرؤ يستضيف حد يقول إن السبب فى مشاكلنا كلها هو وقوعنا فى الاحتلال الأمريكى والصهيونى !!

لماذا الآن بالتحديد؟ حد ناصح ومتابع للأحداث هيرد ويقول دا  لأن الأمريكى دعم الاخوان المرة دى وإدى الصابونة للفلول  !  ، مش هختلف معاك ان دا سبب وجيه لكن برضه مش مهم !!  المهم ان فى نظرى هو ان هذا الكلام جاء بسبب تدخل المجتمع الدولى بقيادة أمريكا ضد سياسات النظام الحالى ..

ظنى  الشخصي - وأقول ظنى - أن فيه مسعى حقيقى جاد  من النظام الحالى ( بغض النظر عن النية والهدف ) فى التخلص من الاحتلال  الأمريكى ، كما أن زيادة تلك اللهجة فى الإعلام واللى اتحول الكلام عنها من مجرد كلام عشوائى فى شوية برامج إلى حملة إعلامية قوية لدرجة إن مفيش برنامج ولا ناشط إلا وبيتكلموا فى الموضوع دا .. كمان  دخول تمرد  فى حملة امنع معونة اللى بتنادى  بالاستقلال الوطنى ورفض معونة أمريكا  .. كل الأدلة دى لاتعبر عن نظام فقط هدفه المناورة مع الأمريكى أو الضغط والتهويش .. عفوا دا مش دفاع عن نظام حالى ، دا  توصيف حالة لنظام أدرك وبشكل عملى أنه لايمكن لحل الأزمة الاقتصادية  المتراكمة من سنوات أننا نفضل نعتمد على " معونات " غربية تفرض علينا شروط اننا منعتمدش على نفسنا  ولا نخوض مسار الاصلاح الاقتصادى الوطنى الحقيقى ، وانا بقول الكلام دا افتكرت كلام الجنزورى بعد ثورة 25 يناير فى التليفزيون ان أمريكا ضغطت على نظام مبارك عشان ميكملوش مشروع توشكى !

لكن النوايا والشعارات وحدها لاتصلح للخروج من التبعية ، والهروب من سيطرة المحتل الأمريكى مينفعش نستبدله بمعونات السعودية والإمارات ، ومينفعش اللى يحط الاستقلال السياسي والاقتصادى للبلد  حكومة رأسمالية معندهاش مانع تفضل تستلف من البنك الدولى وصندوق النقد الأمريكى ! ومينفعش نخرج من الاحتلال الأمريكى من غير حشد وطنى وتعبئة ينقصها فصيل إسلامى الهوى  يقدر بالملايين بيعانوا حتى الآن من التهميش والقمع الأمنى والضغط النفسي والمعنوى لمجرد اننا مقبلين على مواجهة إرهابيين فى سيناء وفى أماكن أخرى لا ينتمون للإسلام أساسا ..

كمان الخروج من مستنقع المحتل الغربى مش ممكن يتم من غير ما نتجه لمحور مقاومة النظام الأمريكى الدولى اللى على رأسه  روسيا وكوريا الشمالية و العراق و فنزويلا والصين وإيران ( أيوة إيران !! ) .. يعنى نسيب كل دول ونفضل نشكر الملك السعودى الغرقان فى محيط الاحتلال الأمريكى !؟

برضه وبشكل براجماتى وعملى -  لأن أنا مش هتكلم بلغة المبادئ واللى مش بيفهمها السياسيين فى بلدنا - عايز تخرج من تبعية أمريكا زى مانت بتقول .. يبقى تعمل حشد وطنى وتعبئة أساسها وحدة النسيج واحتواء ملايين الإسلاميين داخل الغطاء الوطنى ودا لن يتم إلا .. بالمصالحة وترك العنف ضد المدنيين والسلميين منهم

عايز تخرج من تبعية أمريكا؟ يبقى تشيل مجلس الوزراء الحالى فورا وتحط رئيس وزراء يميل للاشتراكية الوطنية .. حط خالد على ولا  أحمد سيد النجار

غير كدا يبقى إنت يا إما بتهوش بس بشعار الاستقلال الوطنى كورقة ضغط  عشان تناور امريكا وتخليها تساند توجهاتك زى ماكانت بتعمل مع الاخوان .. أو انت جاد فعلا - وأنا أظن ذلك - بس برضه هتفشل لو مبدأتش تستقل بشكل صحيح ..استغنى عن المستشارين الرأسماليين ورجال الأعمال المنتفعين من الاحتلال الأمريكى ، مش دول أصحاب المرحلة دى